MWANASIKANA DZIDZA: BY NEO BATAKATHI

Thursday 5 February 2015

Written By: Neo Batakathi

MWANASIKANA DZIDZA

Ndakaramba chikoro…

Ndichitizve ndonowanikwa!

Wanikwe…. Ndarambwa!

Ndichinzi handina kudzidza…

Murume, akanditarisa neziso dzvuku

Akadzikisa izwi sesoja rakahwanda mhandu

Akati … “Mwanasikana hauna kudzidza…”

Fundo inochengeta imba yemunhu?

Fundo inoberekera  mwana  kumusana?

Fundo inokuchidzira choto chemwenga ?

Asi fundo imvuto?

Fundo mugoti here?

Kana kuti mugwaku?

Kuita mubikirwa wekachaso unosanganiswa zvese

Chindoendawo…

Ndicho chakandiremadza!

Chikoro ndaingoti ndoindawo …

Teve-teve… seriva rabata tsoko

Dzikame njere dzagomara

Dzagomara njere idzo,

Ehe dzagomara!

Ndakunge rema rabata moto

Murume akati…

“Hauzive!”

“Hauzive….

Zvekusaita panzvimbo!"

Kunge Chisvo anogogodza pasowe

Unoita zambiringa munyemba

Gondo muzvitiyo

Zhundu mundove

“Hauna kudzidza mwanasikana!”

Ndine vakambondidzidzisa

Kuteera murume  kundari…

Vamwe vakandidzidzisa

Kutuka amwene ndakakwira churu…

Pandakazoti pengenu

Wanike ah!

Naivo mabiyangu aya

Haanawo kudzidza!

Mwanasikana dzidza-wee!

Africa ishandurwe newe...

Africa yakamirira…

Kurerwa nezivo yako!

Ndege dzkakumirira,

Nyika inodakutongwa newe!

Fundo inokusukira ndiro…

Fundo inokurwira hondo….

Baba iwe Tsivo! Tete imi Ngwenya!

Ndarambwa kani  Jiri

Ndarambwa nepasi rese

Amai makandiudza kuti,“dzidza!”

Ndakapotsa- fundo…

Ndinoraramira poiko?

Mwanasikana handina ramangwana

Ndakashaya fundo!

Ndakapunza chirongo…

MAGUMO!!!

NYANZVI YESHASHA: SHEPHERD ZENGEYA

Wednesday 4 January 2015

Written By: Shepherd Zengeya

Translator By: Takudzwa Chikepe

NYANZVI YESHASHA

Uye ndiye kurwa wehupenyu hwangu

Uku ndiko kurwa kweupenyu hwangu

Wangu mutambo wandinofarira

Ko sei vasina kundiudza kare

Kuti vakashandura murume

Uyo wandaifunga

Kuti arikurwa

Achiuya neshasha

Shasha yamadzishaha shaiyo

Inondura senyuchi

Inonjenjemera mudenga

Sabetemapapiro

Handina kukwanisa kuzviwana izvi

Kusvipa pandakazviona nenzira yakaoma

Izvo zvibhakera zvichingorira kwazvinobikwa

Imo muno muAfica

MuZaire umu

Mukati mesango chaimo

Mana Nzou, Bera nemhembwe

Imomo manashumba nanambada

Pakanga pasina kutiza ipapo

Kubuda mudenderedzwa

Pinda musango

Chokwadi ndakanga ndiri mutsitsi dzashe

Kana kurumwa neuhwutu takatokukanganwa

Tirikurwa mumakundano makuru chaizvo

Kunyangwe runako rwakanga rwakadyarapo

Ndaitoti ndibatirire muchidambu chetatu

Kunyangwe mumusoro mangu umu zvaive zvitima zvega zvega

Musoro waiita kunge urovhurika usiku ndakurara kuri kuda kufema-nekuneta

Ziso rakaparara iri kunge matombo aiva maoko

Muromo uyu uchinge uchananzva rako ropa

Izvo zvaitoreva kuti kana nerurimi kwakanga kusisina

Kusina zviye zvekumukira chitsvigiri-nanzvi zviye zvandinoda

Kwaingoshuwira kubuda mungarava iyi

Kungozvi dzi nyururwei…chaiyo

Nzveve dzitwasanukira mativi ose kuda kuziva

Kuziva kuti kunze kwakamirasei

Kana nemuromo haukwanise

Kuverenga nguva dzawakashevedza

Mutongi gava kuti aendzanise nyaya iyi

Ndaingoshuwira kuti dai ndaiva kumba

Chichorera changu chemuto chiya

Hurihwo huturu hwangu chaihwo

Kumba kwedu muzinda wezvinyu zvangu zvose

Zvose izvi nokuda kwekurwa uku

Kunyangwe yaiva mari yeutsautsau

Yakawanikwa neutsau tsau

Handichazorwa futi

Ndinodzokorora zvachange

Handichazombodzokera kuhondo futi

Mhuri yangu inondida

Kwete kurwa kuneutsinye uku

Sekuzviratidza kwawakaita

Ndaitoti ndiite hushingi

Kutitira dai ndaizofa

Apo ndaizosangana

Nayonini nayonini

Avo vakaenda kare

Avo vandakangendakanganwa

Saapa ndaitoti ndivarangarire

Semudetembi anorondedzera

Rake detembo

Ndaitoti ndirangarire

Ravo zuva rekuzvarwa

Naro zuva rekufa kwavo

Nekwavakaradzikirwa

Zvakanga zvakaoma

Zvairwadza- unongonzwa

Hondo iyi yaifanira kuti ipere

Ndaitoti ndiimise hondo iyi

Uye ndakaimisa pachokwadi

Ndakawira muvhu

Kwete kuti ndaida

Ingori dzamutsana mutsana

Chirimberi unochiwona wasvikapo

Sesaga rembatata ndakawira pasi

Zvekusamuka zvakare

Zvekuti kana neanoverenga

Aitosvika pakuneta chaipo

Handina kubatsira zuva pakurarama

Ndakapedzerwa pangu

Zvikava zvinhu zvakaitika izvi

Ikoko kuZaire

Mubindu resango

Shasha dzakararama

Asi iye aiva nyanzvi yeshasha!

MAGUMO!!!

TIMBORIANANIKO ISUSU?:BY ZOLISA GUMEDE

Tuesday 3 February 2015

Written By: Zolisa Gumede

Translator: Takudzwa Chikepe

TIMBORIANANIKO ISUSU?

Timboriananiko isusu

Isu avo vakararama kwamakore

Isu avo vasingamiswe nenguva

Tisu takararama mune izvo zvakaparara

Izvo zvakaparara nokuti zvakashaya zivo

Isu tararama kwamakore

Isu hatingamiswe nenguva

Isu- vaoni vehupenyu seraramo

Kunyangwe kune avo vakatsondoreka

Chi chatava zvino

Asi mimvuri yezvatinova chaizvo

Zvatinova chaizvo zvakatitsakatira

Nokuti chokwadi chinounza kugeda-geda

Pamusoro peraramo yedu

Tinorarama mune iyo nguva

Vanotiudza kuti chokwadi chakafanana nekufa

Nechokwadi uchashaya icho nechocho

Saka nyarara umire kuti twi

Pasina kana kupfakanyuka

Kudzivirirwa kubva kuchokwadi

Ndihwo hupenyu hwedu

Saka tinorarama semimvuri

Yezvataifanira kuzova

Nemo mukati mehupenyu

Hunekurwisana kwakapamhamha

Imo muhupenyu uhu

Une matendo kana uchinge wapona

Kwedu kwese kumarwa, kusvuuka nekuchekwa

Kuchiva kunotora chokwadi kubva kwatiri

Timboriananiko isusu

Ichi ndicho chokwadi!

MAGUMO!!!

MUZAYA KARE KWAIYA NANI: BY DAVID MAKACHA

Tuesday 3 February 2015

Written By: David Makacha

Contact: www.socialmediazim.com

Muzaya Kare Kwaiya nani

Karetu kwaiya nani muzaya

Mvura yainaya yedu minda tichirima

Ini wako sekuru ndaibata hamburamaka yendima

Zvakanga zvisiyo izvi zvekunyima

Mumuganga mwedu isu taihinana

Makaka, makebe, tairya techiguta

Dzaitaima mhanza dzechembere nendota kukhomba kurya dzechiguta

Ukapenya dzedu mhatso mazuwa awawo dzainge maguta

Nyamashi yawe mikarakadzo, ndoti karetu kwaiya nani muzaya

Nyamushi pashi paagangarahwe

Kuti ndiMarure ere wadai kushatirwa apana unoziyaba

Zvaide iwo aripo ashurukwa kuti atironzere nekuti ndiwo anoziya

Toboorera ndiyo nzara ngekuti tademera, taziya

Hino hekwakadai kupera asharukwa acho ndiani uchatironzera

Zvadzangodai kusara pwere dzino pwereketa zvisina nzeroba

Zvitsanza hapana achiziye kubikwa kwazvo

Nyika yaita mutsongonono

Saka ndati karetu  kwaiya nani muzaya

Karetu kwaiya nani

Umambo hwaiye majana aishadzanwa

Taiziya mutape ndimutape vanopurutanwa kana vareketa

Nyamasi mutape oitwa zitukawatuka hure rekwaMuganga

Nyamusi toambanirana umambo tichizhindana

Ana adoko obata ndebvu dzaMutape

Makomo nemakwasha aiera apana uchayeresa

Kare kwaiya nani muzaya

Humwe nezunde ramutape ndiwo aiya magariro edu

Nyamasi amazvake mazvake nepangu pangu kurira kwengoma

Yainaya mvura kuti warakata

Onei michero nechowa zvozara kuti chakata

MwaSaye  umwo taidzirya tshakata

MwaMusani umo zvaivemo zvitopota zvaana tungata

Hapana aitwi pwe-e kana idzo n’anga dzachaya hakata

Asi nyamusi  zveshe zvaoma kuti papata

Kare kwaiya nani muzaya

Mhandara nemajaha vaidada neumhandara

Nhasi dzanagano muzaya

Kwakutsakara kwechitoo kunga chisina kumboryiwe nyama

Saka ndati karetu kwaiya nani muzaya

Picture credit: Sekuru Tee, from REKETE CHINDAU  - LEAVE A LEGACY Facebook page 

MAGUMO!!!

NDIMANIKIDZE: BY SHEPHERD ZENGEYA

Saturday 31 January 2015

Written By: Shepherd Zengeya

Editor: Takudzwa Chikepe

NDIMANIKIDZE

Kugara zvenyu kuti tasharara
Hapana chinobuda apa…
Mushana chete…

Ndiwo chete unobuda

Kana nhamo chaiyo…

Ndiyo chete inobuda!

Zvinhu ndimanikidze chete
Handirambe ukandimanikidza
Ndinotobvuma-kumagumo
Ndokuti zvifambe

Tarira vamwe 
Kwavasvika...

Zuro chaiye dzanga dziritsoka
Nhasi dzangoro-dzemotokari
Ndimanikidze ndinobvuma-chete!
Avo…vakuto chaira dzavo motokari

Uyo mhazi, kunyora kana kuverenga?
Vana mbizi pupurai zvimwe manyepo!
Nhasi vatova munyori…
Ndimanikidze… ndinobvuma chete

Mushana nenhamo ndizvo chete!
Mugove…wevakagara tekeshe

Bvunza vana Muzvinafundo
Zuro vanga varipi?
Mombe-zvamboko…kuvasuva
Ndimanikidze ndinobvuma chete!

Hevo vama dokotera
Ndivo votibaya majekiseni

Kana wadenha Mangwiro,
Wotokwinya!
Hazvichada hope
Kwabviwa ndiko kure…
Mishana mizhinji yakasiwa ichingochenama,

Ndimanikidze ndinobvuma chete!

MAGUMO!!!

GUNUN’UNO IYI: YANDIGUNUN’UNISA : BY MARTIN ZILUNGILE JEX ( MUREHWA )

Friday 30 January 2015

Written by: Martin Zilungile Jex (Murehwa)

Editor: Takudzwa Chikepe

GUNUN’UNO IYI: YANDIGUNUN’UNISA

Kuri kurara…ndatadza

Kuri kufunga, kuti chii chandakutadzira mudiwa wangu

Ko kana riri rudo,

Inga ndinokupa rwakapetwa kaviri-nekatatu wani…

Kuti ndezvangu zviito, zvingava zviri zvip

Zvaomesa wako moyo sedombo kudai?

Kana dziri tsamba, inga ndinonyora namashoko akawanda wani…

Kuti hujaya hwangu uhwu, kutindiwo…?

Inga ndakadimbura midzo yacho ndikati,

Ndoita zvamachokwadi, pauri-pauri chete…

Kana ari mashoko akataurwa nehama dzekwangu

Ndinoaputsa nekumaramba!

Kana uri hurombe hwatitambisa ndondo,

Sembwa yotsengeswa uswa..

Ichinzi ‘inyama iyi inyama iyi’

Haiwa ini ndohuramba hurombe hwakadai…

Bhutsu! Chibhakera! Ibva pandiri!

Kana kuine arikukunyengedza mudiwa…

Nditaurire ndirwisane naye namapfumo angu ose!

Ndimuratidze kupfachuka…

Kunoita mwoyo wangu nerudo rwako

Kana kuine arikukufurira mudiwa…

Nditaurire ndimubvise ganda kumeso!

Kuda kufamba achivhaira nepodo yemharadzo…

Dzangu shungu dzakwata mudiwa…

Kubika manhanga chaiko mudiwa wangu,

Nokuda kuziva kuti sei uri kundidaiso mudiwa wangu?

Mwoyo wangu wandondoreka,

Chokwadi mudiwa wagunun’una…

Gunun’uno iyi yandigunun’unisa

Kusvika kugunun’uniso…

Asi pari pakati-kati pemwoyo wangu

Chako chitubu cherudo…chinondipa simba

Neiri simba…aiwa tinokunda mudiwa wangu…

MAGUMO!!!

GUDO GURU: BY CLIVE CHIKUKU

Friday 30 January 2015

Written by: Clive Chikuku

GUDO GURU

Ndiwe zvako Marujata

Kamuchacha...

Une mukanwa makachonjomara...

Chokwadi hauna ganda kumeso,

Haunyare here?

Asi unombonyatsopindwa neiko?

Ukanyarara unovaviwa here?

Zvemumusha mangu unozvibatira papi?

Asi unoda kuti ndigovigwa negonzo?

Uri mhunzamusha chaiyo...ndakuona

Svuuramuromo...

Asi, iwo wako musha wapedza kuunatsa here

Ko zvaunongopona negwaku-mukwaku segunguwo wani...

Kusvaga kamuti muziso mangu uchisiya danda riri mako

Ah! Zvako iwe bodo...

Chokwadi wakaroiwa newakafa

Dai aive mupenyu aikunzwira tsitsi...

Uri mharadzi iwe!

Munhu wemurume asingabvire pamuromo

Aiwa kurai mhanduwe...

Chokwadi kubvunzwa makuhwa nepwere?

Mangwana-mangwana uri kusvereredzwa nepwere

Kuita sebenzi ririkutanda botso...

Gudo guru peta muswe...pfeka ganda kumeso

Nyara Marujata..nyara!

MAGUMO!!!