NDIMANIKIDZE: BY SHEPHERD ZENGEYA

Saturday 31 January 2015

Written By: Shepherd Zengeya

Editor: Takudzwa Chikepe

NDIMANIKIDZE

Kugara zvenyu kuti tasharara
Hapana chinobuda apa…
Mushana chete…

Ndiwo chete unobuda

Kana nhamo chaiyo…

Ndiyo chete inobuda!

Zvinhu ndimanikidze chete
Handirambe ukandimanikidza
Ndinotobvuma-kumagumo
Ndokuti zvifambe

Tarira vamwe 
Kwavasvika...

Zuro chaiye dzanga dziritsoka
Nhasi dzangoro-dzemotokari
Ndimanikidze ndinobvuma-chete!
Avo…vakuto chaira dzavo motokari

Uyo mhazi, kunyora kana kuverenga?
Vana mbizi pupurai zvimwe manyepo!
Nhasi vatova munyori…
Ndimanikidze… ndinobvuma chete

Mushana nenhamo ndizvo chete!
Mugove…wevakagara tekeshe

Bvunza vana Muzvinafundo
Zuro vanga varipi?
Mombe-zvamboko…kuvasuva
Ndimanikidze ndinobvuma chete!

Hevo vama dokotera
Ndivo votibaya majekiseni

Kana wadenha Mangwiro,
Wotokwinya!
Hazvichada hope
Kwabviwa ndiko kure…
Mishana mizhinji yakasiwa ichingochenama,

Ndimanikidze ndinobvuma chete!

MAGUMO!!!

GUNUN’UNO IYI: YANDIGUNUN’UNISA : BY MARTIN ZILUNGILE JEX ( MUREHWA )

Friday 30 January 2015

Written by: Martin Zilungile Jex (Murehwa)

Editor: Takudzwa Chikepe

GUNUN’UNO IYI: YANDIGUNUN’UNISA

Kuri kurara…ndatadza

Kuri kufunga, kuti chii chandakutadzira mudiwa wangu

Ko kana riri rudo,

Inga ndinokupa rwakapetwa kaviri-nekatatu wani…

Kuti ndezvangu zviito, zvingava zviri zvip

Zvaomesa wako moyo sedombo kudai?

Kana dziri tsamba, inga ndinonyora namashoko akawanda wani…

Kuti hujaya hwangu uhwu, kutindiwo…?

Inga ndakadimbura midzo yacho ndikati,

Ndoita zvamachokwadi, pauri-pauri chete…

Kana ari mashoko akataurwa nehama dzekwangu

Ndinoaputsa nekumaramba!

Kana uri hurombe hwatitambisa ndondo,

Sembwa yotsengeswa uswa..

Ichinzi ‘inyama iyi inyama iyi’

Haiwa ini ndohuramba hurombe hwakadai…

Bhutsu! Chibhakera! Ibva pandiri!

Kana kuine arikukunyengedza mudiwa…

Nditaurire ndirwisane naye namapfumo angu ose!

Ndimuratidze kupfachuka…

Kunoita mwoyo wangu nerudo rwako

Kana kuine arikukufurira mudiwa…

Nditaurire ndimubvise ganda kumeso!

Kuda kufamba achivhaira nepodo yemharadzo…

Dzangu shungu dzakwata mudiwa…

Kubika manhanga chaiko mudiwa wangu,

Nokuda kuziva kuti sei uri kundidaiso mudiwa wangu?

Mwoyo wangu wandondoreka,

Chokwadi mudiwa wagunun’una…

Gunun’uno iyi yandigunun’unisa

Kusvika kugunun’uniso…

Asi pari pakati-kati pemwoyo wangu

Chako chitubu cherudo…chinondipa simba

Neiri simba…aiwa tinokunda mudiwa wangu…

MAGUMO!!!

GUDO GURU: BY CLIVE CHIKUKU

Friday 30 January 2015

Written by: Clive Chikuku

GUDO GURU

Ndiwe zvako Marujata

Kamuchacha...

Une mukanwa makachonjomara...

Chokwadi hauna ganda kumeso,

Haunyare here?

Asi unombonyatsopindwa neiko?

Ukanyarara unovaviwa here?

Zvemumusha mangu unozvibatira papi?

Asi unoda kuti ndigovigwa negonzo?

Uri mhunzamusha chaiyo...ndakuona

Svuuramuromo...

Asi, iwo wako musha wapedza kuunatsa here

Ko zvaunongopona negwaku-mukwaku segunguwo wani...

Kusvaga kamuti muziso mangu uchisiya danda riri mako

Ah! Zvako iwe bodo...

Chokwadi wakaroiwa newakafa

Dai aive mupenyu aikunzwira tsitsi...

Uri mharadzi iwe!

Munhu wemurume asingabvire pamuromo

Aiwa kurai mhanduwe...

Chokwadi kubvunzwa makuhwa nepwere?

Mangwana-mangwana uri kusvereredzwa nepwere

Kuita sebenzi ririkutanda botso...

Gudo guru peta muswe...pfeka ganda kumeso

Nyara Marujata..nyara!

MAGUMO!!!

NDAVAONA NDAVATARISA: BY SHEPHERD ZENGEYA (...MHAZI...)

Thursday 29 January 2015

Written By: Shepherd Zengya

Editor: Takudzwa Chikepe

NDAVAONA NDAVATARISA

Zvimwe ndezvimwe,
Kugona kugona chete!
Kufamba nevanogona…
Unonzwa sei?

Chimiro chavo
Ndamva ndamira kuti twi!

Kupfeka kwavo
Kwangu kupfeka kotobvunzwa!

Ko bvudzi ravo
Mavakutedzera VaChikepe kani?
Kumisa tunyanga mumusoro…
Imiwe chii chashata ipapo
Kunzvenga vanogona

Aiwa kunyunya vanogona!

Ko kunyora kwacho
Ndafunda… zvandaiti ndinogona wani
Kusaziva rufu zvamunoona

Aiwa ini ndamuka- ndakutomutsawo!

Ko shamwari dzacho
Imi zvionerei-mega sapamunho pefodya
Varimundege ishamwari chete!
Kumafaro ishamwari chete!
Tarisai vakamira nanaSamaita veMbira Dzemukurumbira

Ishamwari chete! Ishamwari chete!
Mhiri kwamakungwa changove chaunga

Vamwe vototi Mdara munofara here ikoko!

Kuzoti kuseka
Madenha zvirere
Murume anofara zvake iyeye

Pore pore veduwe…achinyemwerera
Kusara kuda-Ini twangu-ndasunga
Gore rino neChikepe aiwa-ndayambuka!
Kusaziva kwangu…mhaka ndaripa
Zvinyoreso nazvo kwati kwati…
Mapepa ekunyorera, ondimutsa

Ramangwanani machongwe asati oshamanáya

Chakudiwa kuzvipira,
Pfungwa yokubudirira…

Kuvanwe vedu,
Chenjera kusara!
Tungamira mberi semunho
VaChikepe vanokukwazisa mberi

Kuti wagona…ramba wakadaro
Aiwa, asara-asara…kumakuwerere
Tsika nditsikewo ndoyava yangu namavara

Ndavaona
Ndavatarisa
VaChikepe

Mbizi yekwa Samaita iyo…

MAGUMO!!!

TSVINA:BY SHEPHERD ZENGEYA (...MHAZI...)

Thursday 29 January 2015

Written By: Shepherd Zengeya

Editor: Takudzwa Chikepe

TSVINA

Matendo kuna tsvina
Nekachikamu kenguva yaatipa
Yekupindura mibvunzo…
Yakanangana naye tsvina!
Vamwe havazive,
Tsvina chii patiri?

Sei tsvinapatiri?

‘Ini ndinosvota nokusemeswa’

‘Muvengi watsvina anodaro

Unobvepi nhai iwe tsvina?
Huchapa wemandorokwati…

Unemakumbo here?
Mheni chaiyo kufamba kwacho…

Kwaunofarira zvikuru kuwanikwa,
Pamunhu ndipo pauri ipapo…

Kunge hove mugungwa!
Venungo vaye vanonyepera kuchena…
Vaye, vasvuuka mawoko nokuombera

Hanzi chitisiyawo tsvina kani- tapfidza

Unosuduruka sei?
Hazvidi chiremba izvi
Kuchena chete semwedzi wagara-nganga

Makore anotevera unozviona sei?
Tinenge-tawanda, uyetichiripo kusvika vafunda vanhu

Saka zvoitwasei tsvina?
Vanhu tererai… akuruma nzeve ndewako

Makomba ekutiviga hamugone kuchera
Mishonga yekuuraya nunzi nemapete tanha-kuzara
Kuoma kwemisoro nepfungwa dzenyu chete!
Kutoda mbiri yerufu rwatsvina…

Hanzi ngaafe ngaafe tsvina

Muzvenyu zvivhitivhiti

Kusangana nehuturu hwangu mugwagwa,

Nemuzvikona- kwenyu kundinyenyeredza

Kundinyeya, kunditya nekunditya!
Nungo idzo-Dzenyu nungo ndochedu chikafu

Hwenyu huchapa…ndizvo zvedu zvikomba!

Zimunhu remunhu!

Kusada kusevenza
Kuda kudya makagara
Kunge varwere…

Chokwadi munopera neni tsvina!

Kupera chaiko…kuti pepepe!

MAGUMO!!!

KURWARA NESHANJE: BY NEO BATAKATHI

Wednesday 28 January 2015

Written By: Neo Batakathi

Editor: Takudzwa Chikepe

KURWARA NESHANJE

Vanodarika nenzira yepano…

Vanongomuwona achirwara!

Vavakidzani…wo vanongoziva kuti murwere

Vepo pamusha, ndivo vanoziva kuti anorwara nei!

Vasori vakambobvunza vemumusha kuti iye anomborwara nei?

Vemusha vaya vakanyara kuzvidoma, kuti anorwara achifamba...

 Vatorwa ndivo vanombokanganwa kuti iye munhu uyu anechirwere….

Udyu meso hoyo! Va-vakidzani vachipfuura nemotokari dzavo…

Miromo dunduma! Vadariki venzira vachiseka havo…

Nzeve twi! Vemusha kana votandara paukama…

Mazino zhinyu !Vasori kana voda kumubata paanorwara napo

Vatorwa ndivo vanozozvioona nekure kuti uyu munhu uyu murwere!

Anenge zingizi kuimba…iye achichema

Mwoyo usina divi kunge nyongorosi

Zizi… rinodzvokora zvivakwa zvevamwe murima.

Mutsipa kurebera zvisi-zvake, ungati imhakure

Bonga! rinotiza vanhu, pedze rovadongorera…

Vatorwa ndivo vanozobvunzawo, kuti humhuka hupi hunenge kurwara uhu?

Uyu munhu murwere uyu…

Inzwa kufemera kunze kunge dadya,

Katanurayi  shanje idzi…

Dzakamugara matunduru!

Godo zvarakadzipa huro?

Mukatanurei shanje idzi…

Asati atandadza…

Haadi kusiyana naro godo.

Padiki..padiki zvabatana! vava vese-zve!

Hona kufamba achibhidhaira kunge pasi pane rata…!

Kufinyama kunge anwiswa mudzepete…

Kunge wakaroiwa neari kumakuvakudaro

Shanje chirwere chinouraya

Kusvotwa hakuna godobori hakuna nyora

Gona reanehasha haritane kufumuka

Zvishuvo zvizere ruvengo zvinogumira kuhope

Shanje dzichakumonerera dzigokuuraya

Kana ukaramba uchiripembedza denda iri!

MAGUMO!!!

FUNDO CHII?: BY SHEPHERD ZENGEYA

Wednesday 28 January 2015

Written By: Shepherd Zengeya

Editor: Takudzwa Chikepe

FUNDO CHII?

Ndiudzeyiwo 
Ndatambura ini..

Fundo chii,

Fundo chimbori chii?

Kubata mabuku
Kuadya mabhuku
Kumapisa mabhuku

Ndiudzeyiwo
Ndatambura ini

Fundo Chii

Fundo chimbori chii?

Kutakura pfungwa
Kudzisendeka pfungwa
Kudzigaririra pfungwa

Ndiudzeyiwo
Ndatambura

Fundo Chii?

Fundo chimbori chii?

Kuperekedza vamwe
Kutenga maCertificate
Kuchema here
Kutaura chirungu
Kutaura chikaranga

Ndiudzeyiwo
Ndatambura ini

Fundo Chii

Fundo chimbori chii?

Ko kudya maningi

Kutamba maningi
Nekumanyisa motokari

I funo here?

Ndatambura
Ndiudzeyiwo
Ndapota

Fundo Chii?

Fundo chimbori chii?

Chingwa china mazai pakati

Ibhutsu inamasokisi mukati

Zidhanduru rinamatanduru mukati?

Haiwa ini ndatadza kuziva

Vanenge vakasiirira pavakatidzidzisa gore rekutanga

Dai vakatanga nekutidzidzisa kuti fundo chii…

Tinotenda kuti tingadai tose tiri vanhu vakadzidza!

Zvino vakatidzidzisa a kuzvika kuna u….vamwe vakapihwa ma u…

Zvisinei hazvo tese takasara tichigona kuverenga, kunyora nekuverenga zvigunwe

Asi hatisirisu toose takasara takafunda!

Hamheno vakafunda kuti vakafundira kupi uye vakafundiswa nani?

Ko zvaasina kuenda kuchikoro uyo akafunda here…

Zvino mufundisi achauya rinhiko kuzotifundisa- fundo?

Ndatambura weduwe
Ndiudzeyiwo
Ndapota…

Fundo Chii,

Fundo chimbori chii

Zvimwe ndingazvibate ruoko

Ndikazvidhoza ndikagara pasi

Ndikatangawo kuzvidzidzisa.

MAGUMO!!!

TSVARAKADENGA:BY MARTEL RIC MAK (CHIEF OF KATANGA)

Tuesday 27 January 2015

Written by: Martel Ric Mak

Editor: Takudzwa Chikepe

TSVARAKADENGA

Mwana iwe...

Runako rwako rwandibata moyo
Ganda rako... nhete ungati kacheche!
Kupfava ungati idonje richangoibva...
Mazino ako kugadzana seairongedzwa!
Ko kuchena kuti mbuu, kunge mwana wemuchena...
Runako rwako mwana iwe...ungati wakaitwa zvekuumbwa
Zvandipa kunanga kwasekuru....kwasekuru vangu chaiko, kuti ivo
Vandipewo mazano...avowo mazano avakapiwa pahwavo hudiki!

Mwana iwe...

Kafambiro kako- mwana iwe... kuyevedza
Unotsika pasi seunorwadziwa... sopanopisa
Uchitsika zvishoma seunonyangira-uchienda
Muviri wako wese uchitevedzera-tevedzera
Nyama dzako dzese dzichitamba-tamba
Mitezo yako yose ichiita kuzungunuka...
Zvinosiya hana yangu yakati dzii!... kwenguva

Mwana iwe...
Paunotaura... mukanwa mako zvinobuda, uchi hwega-hwega
Ndashaya wokuudza... angandibatsira ndiyani zvino?
Kuti uve wangu mudiwa ndifare nokupembera...
Kupembera kunosiya venegodo vakatsamwa...vari fonyo!

Ndikakufunga mwana iwe...

Ruoko rwangu rwerudyi runopuruzira pakati pegotsi
Dai waichindiwona zvino...pandiri popisa namashoko erudo
Chikoshwa changu panyika ino...aiwa ndiwe!

Mwana iwe....

Tsvarakadenga yangu!

Unonditsvarira kadenga iwe...

Chasara kutamba chisveru...kiye

Tirimo mukadenga...kedu- tega tega hedu!

MAGUMO!!!

ZAMBUKO: BY FANUERE BULUWATI

Tuesday 27 January 2015

Written By: Fanuere Buluwati

Editor: Takudzwa Chikepe

ZAMBUKO

Hechooo chikepe icho….hecho

Zvamati chikepe chinotiyambutsa mhiri

Iwe neni toita zvebasa…zvebasa chaizvo

Sezvinoita Mabasa…wemabasa

Aiwa kubva handei…

Mapenzi

Mapenzi

Mapenzi haaaaa mapenzi!

Vasingashandise chikepe pazambuko

Namakarwe ngwarirai kunyonzorewa…

Gore rino chichatiendesa mhiri…

Kana mafashamu hatichatya!

Kwangova kufefeterwa koga

Takanange mhiri…vhai vhai tichisundwa nemhepo

Chakabaya chikatyokera…iwe

Nepfungwa dzedu hatichina,

Topembedza mutauro wevamwe…

Rwedu rurimi toruhwandisa kuseri kwehozi

Toti runonyadza!

Toshuva kuva varungu…

Kusatenda chaMwari,

Chokuzvarwa nacho munyika ine huchi nomukaka….

Hechooo chikepe icho….hecho

Chikepe ndipfuudze ndiende

Ndipfuudze ndiyambuke zambuko iri!

Ndibire mhiriko kunaVaMabasa ndiite zvebasa…

Ndohusiya…ehe ndohusiya hupenzi uhu

Aiwa mufudzi wandibaira zani

Chokwadi simbi inorodzwa neimwe simbi

Ndatenda hangu mufudzi…Shumba Mhizha

Iwe neni tine basa…

Njere ngadzirege kufa sedzavaamwe

Asi ngatichisumudzire mudenga denga…

Chedu chokuzvarwa nacho!

Hechooo chikepe icho….hecho

Hechooo chikepe icho….hecho.

MAGUMO!!!

MIRA: URARAME: BY ZOLISA GUMEDE

Tuesday 27 January 2015

Written By: Zolisa Gumede

Translator: Takudzwa Chikepe

MIRA: URARAME

Muhusiku hweusiku

Apo ruoko rwemarwadzo runosverera

Nehutsinye hwemharadzo

Kune icho zvacho… chingapfukunyuke

Kana icho chinozvikambairira

Kana icho chinozviraramira…

Mira! Mira zvinemutsindo!

Mira! Mira pasina kuchandurwa…

Mira! Mira pasina kusudurudzwa…

Mira! Mira pasina kutyiswa nedimburo

Zvimiririre…pasina kutyiswa

Kutyiswa nekufema kusina hupenyu

Mira! Nyatsomira!

Uchamira here iwewe…kana kuti uchawira pasi?

Kuwira pasi chaipo…wokanganikwa zvachose…

Kukanganikwa zvachose, pasina chako chingarangarirwa,

Kana rako zita…kushaya kana mumwe anorirangarira…

Kuwisirwa pasi nehupenyu…rufu pachezvaro!

Saka-mira… urarame!

Mira!… uye umise…

Umise rufu samambo wehupenyu

Umise marwadzo sehwemunhu hupenyu

Tirimuka! Uvuruke… nerako rese simba!

Hudzvinyiriri haungatonge!

Saka-mira…urarame!

MAGUMO!!!

WANGU AKATSAKATIKA: BY SHEPHERD ZENGEYA

Friday 23 January 2015

Written By: Shepherd Zengeya

Editor: Takudzwa Chikepe

WANGU AKATSAKATIKA

Ndangova buru romusha
Rinochengeta musha
Ndakadirwa vanodero
Vose vanondiombera…

Kwangu ndiko kudanga
Wangu akatsakatita…
Kumafuro ndega!
Muswe uchingotanda nhunzi,
Kana mafuro acho ondiremera…

Veduwee-tenzi
Kundidaro here

Kundidaro here shuwa?

Danga rondiremera

Rondiremera danga iri…

Ndinogara ndakasuwa

Kusuwa hakuchabvi pandiri…
Wangu makamuisa kupi,

Kupi wangu-wangu makamuisa?

Ndanzwa nokupaza danga
Rangu gumbo rakatovhunika
Dziri shungu dzokuda wangu…

Mapere andiona… kutiza chete!
Kuzoti dziri shumba kutsauka,

Kukwenyana nokundinyeya
Wangu aripi?

Wangu makamuisepi?

Kana chirichokwadi

Ichi kana chiri chokwadi
Ndaradzwa tenzi…

Shiri dzinoimba kuHarare
KwaMereki KwaZindoga
Arikugochiwa vachimwa mamba

‘Sviyo…tsviriyo…sviriku…ochewa’

Nyararai apa vana shiri- twumuromo twusinezwi!

Ko dehwe rake riripi
Butsu…shangu chaidzo?
Mabhandi emaburukwa sunga dzisimbe
Mabhegi emucheneso emadzimai
Zviwhepu zvekuchaisa iwe…

Zviwhepu iwe…taura wangu makamuisepi?

Tenda vakakudira
Kukuita bhuru remusha!
Iwe! Kwamereki…kwaZindoga
Ndiko kwawaiperera!
Vachinwa vachikugocha
Vachitamba vachiimba…

Whepu! Whepu! Whepu!
‘Dzokera- mudanga’
Wangu arikundirova
Handirwadziwe nechiwhepu ini!
Uyu ndiwangu arikundirangarira norudo…

Asi Tenzi ndaradzwa kusvika nditsakatike

Ndarwadziwa…kuti rwa…dzi….weeeeeee….

Weeeeee….yoweeee maihweee…ndarwadziwa!

MAGUMO!!!

...RUOKO KWEE... BY: HUDSON CHITENGA

Thursday 22 January 2015

Written By: Hudson Chitenga

Editor: Takudzwa Chikepe

…RUOKO KWEE…

Makore akakorerana

Ndainekaira semombe yemashanga

Pano nekoko kutsvaga aizondibvongera

Rinopfungaira utsi…

Bhutsu yakapera kufamba

Iye paRusape,

Ndakati handinete

Shangu ndokuikanda kudurunhuru

Ndokufamba nedzake Moyo…chiberekerwo

Hedzo tsoka…dzakaibuditsa misodzi

Ari matuzu, chitsitsinho chikademba vakafa

Rangu ziso…rainge riri dzvuku seropa

Ndakaringa mberi sesoja rinosvika kure

Paheadlands ndiye pfacha…

Yangu nyama yachiti mbwododo kuneta

Sendarohwa nemabhurakwacha nemipinyi!

Ndakaruma angu maromo…

Nokuti ndaiziva kuti pane ziya dovi riripo!

Havooo Moyondizvo maRusape doo

Ndokukarara…kusheedzera rusiya

Rusiya…icho chisikana Lucia pachingezi

Hachina kunonoka kuuya pedyo naMwoyo!

Chakaziva kuti chawana mwoyo unerudo…

Uyo mwoyo unoshuwira rugare!

Ndakamuti ruoko kwee naye hutu!

KwaMrehwa uko vakasvikoreva matendo vachiuchira

Imbwa dzakahukurira rudo nekufara…

Naidzo kitsi dzakabata makonzo,

Kutichenesera musha!

Vopembera anaRowesai

VanaEllector vokubvurirwa jeda…

Rakacheka nyika zuva…

Aiwa, wamgu ndakamuwana nemwoyo!

RUOKO KWEE

MAGUMO!!!

NHAMO: BY SHEPHERD ZENGEYA

Wednesday 21 January 2015

Written By: Shepherd Zengeya

Editor: Takudzwa Chikepe

NHAMO

Tsanangudzo inhamo pamhuno sefodya
Kutamba nayo, ndiko kuchema-nhamo…

Riri sadza nhamo kupakura chivindi

Vaku-vaku, za-za, todo-todo-tono
Ko kuribika ishurudziro yemhezi dzenhamo
Chiri chingwa kushisha mukurumbira chaiwo

Vanabhoki vanoparidza chikweee makatarisa

Nhamo haidyiwe inotaurwa chete

Dai yaidyiwa- handiti dzingadai dzangano…
Kupfunya kunge rusero midzi kudzika- dzikiti

Iyi ndiyo nhamo chaiyo
Inga wani inhamo..
Varikure vanodetemba

Veduwe nhamo ifuza
Kuwira painoda zvayo
Kufushunura- uye asingaifungire
Anoti nhamo ndotoinzwa kumhiri uko
Inoparadza pfungwa neupfumi
Dziri shungu kuisudurudza…

Tsva- tsva…ibva iwe nhamo iwe
Yadzika midzi, mikono inobvuma
Vatete vanobata kumeso
Mikono ichishinyira…

Vanamati zvinotoda mwari chaiye
Mwari achibetsera vano zvibetsera
Kutofamba ndizvo zvasara
Vamwewo ava kupangana mazano
Iri nhamo yadzika midzi…

Ane nhamo ari nani
Kusiyana kwenhamo
Vamwewo vano ishura
Ndivo vaya vane nhamo isanganzwisisike
Vanotambura nokuda kudya upfumi
Vanotambura nokuti ndochaira ipi garimoto pane danga radzo
Ndopfeka ipi kushaya hembe panedzakawanda
Chikafu kuita chokurasa nokuguta…

Kuchipatara kunorapwa pfungwa- BP
Murikufungeiko vachiremba vabvunza
Hameno zvangondibata kurikunyara chokwadi

Nhamo!

Chaiyo nhamo..

kungomuka wakaoma muromo

Nhamo!

Ini handidi nhamo
Asi ndakuyambirai
Ino wira painoda
Chenjera nhamo..

Ramba nhamo!

HIYA.....CHAKACHAYA!!!

MAGUMO!!!