MUFORO: BY SHEPHERD ZENGEYA

Wednesday 7 January 2015

Written by: Shepherd Zengeya

Editor: Takudzwa Chikepe

MUFORO

Aikazve… ko munhu zvoowuya akabata bakatwa!

Zvino isu hatibve…isu hatibudemo muforo!

Muforo ndimo medu mumba,

Muforo ndimo medu sechibage!

Dzinza redu chibage…

Mutupo, tichiera upfu, bota, sadza kana mbeu!

Muforo ndiwo wedu musha watinoziva,

Kunyangwe ukabvunza sahwira wedu chiguri,

Vanokuudza zvimwechete izvozvo.

Redu dzinza rose rinokurira muforo…

Vamwe ndovanogara kumunda kana kuti kwamunda,

Vamwe vachigara kwamunda kana kuti kumunda!

Mumakura…kana kuti mukukura tinongoona tirimo mumunda

Kana vari ivo vedu vaenzi, vanongotishanyira imomo medu mumunda

Vari vanhu, dziri shiri, mombe kana madhongi- ungori musanganisirwa ikoko kwamunda!

Vose vanofara zvikuru kutiona tirimo muforo,

Kana nesuwo tinofara kuvaona tirimo muforo!

Saka ini ndobva ndabvunza,

Takanyatsosiyanei- ini newe munhu?

Ini ndoona kunge takafanana ini…

Nhamo inozouya, kana tabereka tiri kwamunda kwatinogara tiri muforo!

Kutichengetedza vanotichengetedza vanhu, kana varoyi voda kutipina…

Unomuona shiri ouya…shasharara shesherere shishiriri…kuda kutityisa!

Unomuona gudo ouya…hamu-hamu hemu-hemu himu-himu Homu-Homu- kuda kutityisa!

Kana naiyewo mombe…nerwako rwuyo rwusingaperi…mhoooooouwouwouwou- kuda kutityisa!

Hatitye zvakadai isu…rwake rudo munhu rwunotwufuridzatwese utu,

Isu tichingosara hedu tiri muforo!

Asi munhuka….hehehede ndaseka

Unomunzwa arikure munhu…

‘Ndichambotarisa chibawe kumunda tingawane aparadzwa’

Izvo ane hwakehwo hurongwa!

Chinotishamisa ndechinotishamisa…

Tinozobviswa muforo muya kwamunda tichozoiswa mudara nasahwira wedu muguri!

Pasina chinguva unozoona tabvisa muforo, takuendeswa kuchigayo nasahwira wedu muguri!

Sahwira wedu muguri ndipo tinopedzisira kuvaona…

Hatizive kuti vanozomufambisa sei?

Asi tinonzwa kuti anoiswa muchoto kana kuzopuwa mombe odyiwa!

Zorora murugare sahwira woye…

Asi munhu unofarisa shuwa…

Kutitsvagisa bota shuwa?

Kutitsvagisa sadza isusu?

Isu tinozokwatiswa tiri mupoto kuitwa bota kana sadza…

Remunhu uya wamunofarira…

Tinodyiwa…kunzi kanu kanu kanu,

Tobva tanzi  nyobvo nyobvo nyobvo

Tozobuda hedu…asi tapera tose tose.

Ndiwo maforero atinoita isu vana chibage tirimo muforo

Zvose izvi zvichiitika tirimo muforo

Imo medu matinoziva muforo

Imo medu matinokurira muforo

Imo mdedu matinofarira muforo

Dai mutupo waidyiwa…

Ndairidya chete sadza iro, bota iro kana hupfu uhwo!

Asi nenyaya yemuforo iyi…handikwanise veduwe…

Ndotofira muforo…ndimo mangu muforo!

MAGUMO!!!