UKAMA NEHWAHWA: BY SHEPHERD ZENGEYA

Monday 19 January 2015

Written by: Shepherd Zengeya

Editor: Takudzwa Chikepe

UKAMA NEHWAHWA

Ipo pakukura

Ndakakura nehama…
Dzose ndinodzida,
Idzo dzinondida!

Nekufamba kwenguva
Ndichizvifambira zvangu
Pfacha napfeche tasangana

Ini ndinonzi munhu
Ini ndinonzi hwahwa

Ini ndakaberekwa namai nababa
Ini kuberekwa kwangu-hwahwa,

Kunoda makore etsanangudzo…

Ndakasanganiswa nezvakawanda
Ndokupiswa kuti ndiberekwe…
Hukasha hwangu ndinotoupa munhu kuti upere
Ndiye anotounzwisisa kupfura mhuka

Kana ndatamba naye munhu
Anochema nokufara kutosvika kutoimba hererere

Kana apenga neni haabatike munhu
Anotoda mapurisa anepfuti…

Handingowanikwe pese pese,
Wotoburitsa ndarama kuti tiite ukama!

Asi kana ukama wabata
Kusiyana rufu chete
Uchipika kuvava- kunakirwa neni
Iwe munhu hukama wedu ndewedu
Kusvika kumagumo.

MAGUMO!!!